Վրաստանում Ուկրաինայի դեսպանությունը ցանկանում է շնորհակալություն հայտնել Վրաստանի կառավարությանը, անձամբ Վրաստանի վարչապետ Իրակլի Ղարիբաշվիլիին և բոլոր այն մարդկանց, ովքեր միացել են Ուկրաինայում հազարավոր խաղաղ բնակիչներին օգնելու գործին,- ասվում է Վրաստանում Ուկրաինայի դեսպանության հայտարարության մեջ։
Ուկրաինայի դիվանագիտական ներկայացուցչության հայտարարության մեջ նշվում է, որ Ուկրաինա են ուղարկվել արդյունաբերական գեներատորներ, որոնք կարող են օգտագործվել հիվանդանոցների, ՋԷԿ-երի և էլեկտրակայանների, խմելու ջրի պոմպակայանների և այլ կենսական նշանակության օբյեկտների անխափան աշխատանքի համար։
«Մեր ընկերների ու դաշնակիցների, այդ թվում՝ մեր եղբայր Վրաստանի օգնությամբ և աջակցությամբ մենք կհաղթենք համաշխարհային չարիքի՝ ռուսական ֆաշիզմի դեմ այս մարտում։ Ոչ մի թեւավոր կամ բալիստիկ հրթիռ, անօդաչու թռչող սարք և կամիկաձե ինքնաթիռներ, որոնք ներկայումս գրեթե ամեն օր արձակվում են Պուտինի ռուս զինվորական հանցագործների կողմից բնակելի շենքերի և էլեկտրակայանների ուղղությամբ, չեն կարողանա ծնկի բերել Ուկրաինայի ժողովրդին և միայն կամրապնդեն մեր ջանքերը՝ ռուս զավթիչների նկատմամբ ամբողջական և անշրջելի հաղթանակ տանելու համար»,- ասված է հայտարարության մեջ։
Վրաստանի վարչապետ Իրակլի Ղարիբաշվիլիի հանձնարարությամբ Վրաստանից Ուկրաինա է ուղարկվել 25 բարձր հզորության գեներատոր։
