Եվրոպական երկրներ մեկնել ցանկացողները 2023 թվականի վերջից պետք է թույլտվություն ստանան և վճարեն 7 եվրո։
Նորույթը, ամենայն հավանականությամբ, ուժի մեջ կմտնի նոյեմբերից, և կվերաբերի ավելի քան 60 երկրների, այդ թվում՝ Վրաստանի քաղաքացիներին, ովքեր առանց վիզայի մուտք են գործել Շենգենյան գոտի։
Ինչպես նշվում է Եվրահանձնաժողովի պաշտոնական կայքում, «Եվրոպական ճանապարհորդության տեղեկատվության և թույլտվության համակարգում» (ETIAS) գրանցվելու համար անհրաժեշտ կլինի լրացնել հատուկ էլեկտրոնային ձևաթուղթ և հայտի հաստատման դեպքում՝ Եվրոպա մեկնելու թույլտվությունը տրվելու է երեք տարի ժամկետով։ Ճամփորդության հայտի թարմացումը կպահանջվի միայն այն դեպքում, եթե քաղաքացին որևէ պատճառով փոխի անձնագիրը թույլտվության գործողության ժամկետում։
Եվրահանձնաժողովի տվյալներով՝ Շենգենյան տարածք մուտք գործելու համար անհրաժեշտ կլինի 18-ից 70 տարեկան մարդկանց համար վճարել 7 եվրո հարկ, իսկ մինչև 18 տարեկան և 70 տարեկանից բարձր անձանցից գանձում չի կատարվի։
Էլեկտրոնային հարցաշարում, որը պետք է լրացվի Եվրոպա մեկնելուց առաջ, քաղաքացիները նշում են իրենց անձնական տվյալները՝ ծննդյան վայրը, ծննդյան ամսաթիվը, հասցեն, հեռախոսահամարը, կրթությունը և աշխատանքի վայրը։ Դիմորդները պետք է նաև նշեն ԵՄ անդամ երկիրը, որտեղ նախ կայցելեն: Դիմումի ձևը կունենա նաև դաշտ, որտեղ անհրաժեշտ կլինի պատասխանել առողջության, քրեական անցյալի և այլնի վերաբերյալ: Եվրոպա մեկնելու համար անհրաժեշտ թույլտվություն ստանալուց հետո այն տպելը պարտադիր չի լինի։
Եվրահանձնաժողովում պնդում են, որ նոր համակարգի ներդրումը Եվրոպայում ճանապարհորդությունն ավելի անվտանգ կդարձնի։
